Seigla er tónlistarhátíð sem var stofnuð árið 2021 og hefur farið fram árlega aðra helgina í ágúst í Hörpu. Hátíðin hefur það að markmiði að skapa náið samfélag meðal flytjenda og áhorfenda, þar sem tónlist er sett í forgrunn og áhersla lögð á að brjóta niður hefðbundin mörk milli þeirra sem flytja listina og þeirra sem njóta hennar. Tónleikar Seiglu eru skipulagðir með það í huga að upplifun áhorfenda verði persónuleg og að tónlistin skapi tengsl milli fólks. Staðsetning innan Hörpu og nálgun tónleikanna eru fjölbreytt og óhefðbundin, með það að markmiði að ná til mismunandi hópa og auka aðgengi að sígildri- og samtímatónlist. 

Frá upphafi hefur áherslan verið á að ná til bæði ungs og fjölbreytts hóps tónleikagesta ásamt áhugafólki um tónlist sem almennt sækir ekki sígilda tónleika. Einnig er áhersla á að bjóða ungu og upprennandi tónlistarfólki sem starfar á Íslandi mikilvæg og verðmæt tækifæri til að koma fram í Hörpu. Seigla leitast við að bjóða upp á viðburði sem stuðla að þátttöku og lifandi samskiptum milli listafólks og gesta. Næstu þrjú ár er hátíðin einnig í samstarfi við doktorsrannsókn sem er haldið úti af Ernu Völu Arnardóttur, stofnanda og listrænum stjórnanda Seiglu, í samstarfi við Royal Academy of Music í London, sem skoðar hvernig samþætting persónulegrar frásagnar í tónleikadagskrárgerð (e. concert programming), sérstaklega á samfélagsmiðaðri tónlistarhátíð eins og Seiglu, stuðlar að nánari tengslum milli flytjenda og áhorfenda, sameiginlegum upplifunum og uppbyggingu samfélagskenndar, bæði frá sjónarhóli flytjenda og tónleikagesta.